Oifigear ùr tuineachaidh air fhastadh ann an Innse Gall

Gus taic a chur ri tàlant a thighinn no a dh’fhuireach san sgìre, tha Iomairt na Gàidhealtachd ’s nan Eilean (HIE) agus Comhairle nan Eilean Siar (CnES) a’ maoineachadh na dreuchd shònraichte seo.  

Bidh Kareen NicRuairidh a rugadh ann an Uibhist a Tuath, a’ tabhann cuideachadh do dhaoine a tha airson in-imrich agus tlachd a ghabhail à beatha eileanach ann an Uibhist.

Tha an dreuchd 12-mìosan seo mar phàirt de phròiseact pìleit a tha a’ coimhead ri stad a chur air crìonadh san àireamh-sluaigh ann an Uibhist.

Bidh prìomh phàirt de dhreuchd Kareen an lùib a bhith ag obair le buidhnean com-pàirteachais agus buidhnean eile air feadh Innse Gall, gus fiosrachadh deatamach a thional a thaobh taigheadas agus cùisean eile ris am bi daoine a’ dèiligeadh nuair a tha iad a’ gluasad a-steach don sgìre.   

A thuilleadh air a bhith a’ toirt seachad stiùireadh do dhaoine a tha a’ sireadh cuideachaidh le thighinn a dh’fhuireach sna h-eileanan, bidh Kareen ri làimh gus daoine a tha a’ planadh air imrich do na h-eileanan, a chuideachadh.  Stiùiridh i iad gu na seirbheisean riatanach fhad ’s a tha i a’ tabhann fiosrachadh mu chothrom air seirbheisean ionadail, lìonraidhean agus stiùireadh san fharsaingeachd mun choimhearsnachd.

Is e an t-amas, taic a chur ri leasachadh air tuilleadh phròiseactan is iomairtean gus cuideachadh le dèiligeadh ri crìonadh san àireamh-sluaigh. Is e a’ bhuil a thathar a’ sùileachadh gum bi iadsan a tha a’ gluasad don sgìre, leis an taic cheart, a’ roghnachadh fuireach agus gealltanas a thoirt don sgìre, agus fiù daoine eile a bhrosnachadh gu gluasad don àite. 

Thuirt Kareen:

“Is e cothrom brosnachail a th’ ann a bhith nam oifigear tuineachaidh. Tha mi dìoghrasach agus dealasach mu dhaoine a tha gnìomhach gu h-eaconamach a ghleidheadh agus a tharraing gu na h-eileanan gus fuireach agus obair, agus an comasachadh gu bhith mar eileanaich a’ gabhail ri beatha nach eil cho àbhaisteach, làn chothroman agus spiorad coimhearsnachd ann an àite far a bheil gach neach di-beathte.”

Tha dreuchd Kareen mar aon de thrì dhreuchdan tuineachaidh, a tha gan stèidheachadh air feadh na Gàidhealtachd ’s na h-Eileanan gus daoine a tha a’ gluasad chun na sgìre a chuideachadh, comhairle ath-ghluasad a thoirt dhaibh agus fiosrachadh a thional mu dhùbhlain sam bith air an tig iad tarsainn air an t-slighe, agus comhairle a thoirt seachad mu ghnìomhan san àm ri teachd.  

Tha na dreuchdan gam fastadh air bunait pìleit de 12 mìosan ann an trì sgìrean ùghdarrasan ionadail – Innse Gall, Earra-Ghàidheal is Bòd agus a’ Ghàidhealtachd.  

Fhad ’s a tha Riaghaltas na h-Alba a’ leasachadh nan slatan-tomhais airson modh-obrach sòn ath-shluaghachaidh a dhèanamh foirmeil, tha na sgìrean pìleit seo a’ gabhail cheumannan gus eadar-theachdan ùra fheuchainn a-mach agus dàta ionadail a thional sa choimhearsnachd mar thaic do chuideachadh le fàs air àireamh-sluagh, gus dèiligeadh ri an dùbhlain shònraichte fhèin.

Gu làithreach, tha HIE a’ gabhail àireamh de raointean rannsachaidh is luachaidh os làimh a chuidicheas le tuilleadh beachdachaidh fhiosrachadh, a thaobh ath-shluaghachaidh agus tarraing tàlaint. 

Tha CnES a’ tuigsinn buaidh di-shluaghachaidh ann an coimhearsnachdan nan eilean agus ag amas air taic a chur ri ceumannan airson dèiligeadh ri crìonadh àireamh-sluaigh a thilleadh, agus seasmhachd a dhèanamh tèarainte. Gheibh Uibhist, mar a’ chiad sgìre pìleit, buannachd às an dà chuid eadar-theachd dhìreach agus an obair com-pàirteachais le coimhearsnachdan is buidhnean gus taic a chomharrachadh agus a stiùireadh gu far a bheil feum air.

San eadar-ama, tha HIE a’ fastadh dhreuchdan ann an Innse Gall hie.co.uk/about-us/vacancies/ourohjobs

Faodar dreuchdan a tha bàn gu làithreach aig Comhairle nan Eilean Siar fhaicinn air làrach-lìn (cne-siar.gov.uk).

Deireadh.